Müasir informasiya məkanında hər kəsin fikir bildirmək hüququ var. Lakin bu hüquq heç kimə faktları təhrif etmək, sübutsuz ittihamlar səsləndirmək və ya görülən işlərə kölgə salmaq imkanı vermir. Təəssüf ki, son dövrlər bəzi dairələr tərəfindən heç bir rəsmi sənədə, araşdırmaya və ya məhkəmə qərarına söykənməyən iddialar ictimai rəyə təsir göstərmək məqsədilə tirajlanır.
Ancaq həqiqət emosiyalarla deyil, faktlarla ölçülür. Lənkəran, Astara, Lerik, Masallı, Yardımlı və Cəlilabad rayonlarını əhatə edən 1 Saylı Regional Ekologiya və Təbii Sərvətlər İdarəsinin fəaliyyəti illərdir konkret nəticələr və dövlət qarşısında müəyyən edilmiş vəzifələrin icrası ilə qiymətləndirilir.
Tənqid etmək asandır. Çətin olan məsələ isə hər gün təbiətin qorunması üçün məsuliyyət daşımaq, qanunvericiliyin tələblərini icra etmək, vətəndaş müraciətlərini araşdırmaq və ekoloji təhlükəsizliyin təmin olunmasına xidmət etməkdir. Bu yükü daşıyan insanların əməyini əsassız iddialarla gözdən salmağa çalışanlar ilk növbədə ortaya fakt qoymalıdırlar.
Heç bir sübut təqdim etmədən səsləndirilən ittihamlar nə hüquqi, nə də mənəvi baxımdan dəyər daşıyır. Cəmiyyət artıq dedi-qodu ilə həqiqəti ayırd etməyi bacarır. İnsanlar bəyanatlara deyil, görülən işlərə baxırlar.
Rafiq Ədilovun rəhbərlik etdiyi kollektiv haqqında fikir yürüdənlər də unutmamalıdırlar ki, hər bir iddia məsuliyyət tələb edir. Fakt olmadan səsləndirilən ittihamlar yalnız həmin iddiaların müəlliflərinin mövqeyini zəiflədir və ictimai etimadı sarsıdır.
Bu gün əsas məsələ kiminsə sensasiya yaratmaq cəhdi deyil, ölkənin təbii sərvətlərinin qorunmasıdır. Bu istiqamətdə çalışan insanların fəaliyyətinə qiymət verilərkən emosiyalar deyil, nəticələr, qanun və faktlar əsas götürülməlidir.
