Deputatlar AŞPA-nın Parisdəki iclasında müzakirələrdə iştirak edəcəklər

Milli Məclisin Beynəlxalq münasibətlər və parlamentlərarası əlaqələr komitəsinin sədri, AŞPA-da Azərbaycan nümayəndə heyətinin rəhbəri Səməd Seyidov, deputatlar Sevinc Fətəliyeva, Rafael Hüseynov, Erkin Qədirli və Kamal Cəfərov Avropa Şurası Parlament Assambleyasının Büro, Siyasi işlər və demokratiya, Hüquqi məsələlər və insan hüquqları, Sosial məsələlər və davamlı inkişaf, Mədəniyyət, təhsil və elm komitələrinin 30 noyabr - 14 dekabr tarixlərində Fransanın Paris şəhərində keçiriləcək iclaslarında iştirak edəcəklər.

Bu barədə Telexeber.az-a Milli Məclisdən məlumat verilib.
Komitə iclaslarında Avropa Şurasının İnsan hüquqları üzrə komissarının seçkiləri, Ölüm hökmünün ləğvi üzrə məruzəçinin təyin olunması, Assambleyanın işində gənclərin rolunun gücləndirilməsi, Mədəni irs və iqlim dəyişiklikləri, Müharibə və sülh zamanı mədəni kimliyin silinməsinin qarşısının alınması, Avropada uşaqlara qarşı zorakılıq, Gələcək nəsillər üçün insan haqlarının müdafiəsi, İtkin düşmüş miqrantlar, qaçqınlar və sığınacaq axtaranlar kimi mövzular və bəzi təşkilati məsələlər nəzərdən keçiriləcək.

Milli Məclisin deputatları komitələrdə müzakirə olunacaq məsələlərə münasibətlərini bildirəcəklər, qeyd və təkliflərini səsləndirəcəklər.