Paytaxtın 205 nömrəli tam orta məktəbi ilə bağlı Telexeber.az-ın qaynar xəttinə daxil olan şikayətlərin sayı artmaqdadır. Məktəbdə təhsil alan şagirdlərin valideynləri iddia edirlər ki, müxtəlif tədbirlər, buraxılış mərasimləri və qiymətləndirmə prosesləri adı altında onlardan davamlı şəkildə pul tələb olunur.
Valideynlərin sözlərinə görə, xüsusilə 9, 10 və 11-ci sinif şagirdlərinin ailələri bu yığımlardan ciddi narahatdır. Onlar bildirirlər ki, son aylarda müxtəlif məqsədlərlə vəsait toplanması adi hala çevrilib və artıq bir çox valideyn buna etiraz etməyə başlayıb.
Şikayətçilər qeyd edirlər ki, məktəbdə Zəhra adlı müəllimənin adı pul yığımı prosesində hallandırılır. İddialara görə, bəzi hallarda vəsaitlərin toplanması məhz onun vasitəsilə həyata keçirilir. Valideynlər hesab edirlər ki, təhsil müəssisəsində əsas diqqət tədrisə yönəlməli olduğu halda, müxtəlif maliyyə tələbləri ailələrin üzərinə əlavə yük yaradır.
Müraciət edən valideynlər bildirirlər ki, bu cür hallar artıq narazılığın kütləvi xarakter almasına səbəb olub. Onların sözlərinə görə, xüsusilə buraxılış siniflərində oxuyan şagirdlərin valideynləri ən çox maliyyə təzyiqi ilə üzləşən tərəfdir.
Valideynlər aidiyyəti qurumları məsələyə müdaxilə etməyə, məktəbdə aparıldığı iddia olunan pul yığımı hallarını araşdırmağa və ictimaiyyətə ətraflı məlumat verməyə çağırırlar.
Qeyd edək ki, səsləndirilən fikirlər müraciət edən valideynlərin iddialarına əsaslanır. Telexeber.az qarşı tərəfin – məktəb rəhbərliyinin, adı çəkilən müəllimənin və aidiyyəti təhsil qurumlarının mövqeyini dərc etməyə hazırdır.
