Zaqatala rayonunda dəmir yolu vağzalı istiqamətində çay yatağından material daşınması ilə bağlı yayılan videogörüntülər bölgədə ciddi müzakirələrə səbəb olub. Telexeber.az-ın rəsmi YouTube səhifəsində işıqlandırılan görüntülərdən sonra sosial şəbəkələrdə yüzlərlə istifadəçi məsələyə münasibət bildirib və aidiyyəti qurumların fəaliyyəti ilə bağlı suallar səsləndirib.
Müzakirələrin əsas ünvanlarından biri Şəki, Qax, Zaqatala, Balakən və Oğuz rayonlarını əhatə edən 7 saylı Regional Ekologiya və Təbii Sərvətlər İdarəsidir. Vətəndaşlar hesab edirlər ki, təbiətin qorunmasına cavabdeh qurumlar yayılan görüntülərlə bağlı ictimaiyyətə aydın və ətraflı məlumat verməlidir.
Sosial şəbəkələrdə yayılan rəylərdə qeyd olunur ki, bölgənin çayları, meşələri və digər təbii ehtiyatları dövlətin və xalqın sərvətidir. Bu səbəbdən hər hansı fəaliyyətin qanunvericiliyin tələblərinə uyğun olub-olmaması barədə cəmiyyətin məlumat almaq hüququ var.
Telexeber.az-ın yayımladığı görüntülərdən sonra bir çox vətəndaş sual edir: əgər hər şey qanun çərçivəsində aparılırsa, niyə ictimaiyyətə rəsmi açıqlama verilmir? Əgər araşdırma aparılıbsa, nəticələri haradadır? Əgər araşdırma aparılmayıbsa, bunun səbəbi nədir?
Ekologiya sahəsində çalışan mütəxəssislər bildirirlər ki, çay yataqları təbii ekosistemin mühüm hissəsidir. Bu ərazilərdə həyata keçirilən istənilən fəaliyyət ciddi nəzarət və monitorinq tələb edir. Məhz buna görə də ictimaiyyət aidiyyəti qurumların daha fəal mövqe nümayiş etdirməsini gözləyir.
Şəki-Zaqatala bölgəsi Azərbaycanın ən zəngin təbiət guşələrindən biri hesab olunur. Bu ərazilərdə yerləşən meşələr, çaylar və biomüxtəliflik yalnız bu günün deyil, gələcək nəsillərin də sərvətidir. Ona görə də ekoloji təhlükəsizlik məsələləri ilə bağlı yaranan suallar cavabsız qalmamalıdır.
Telexeber.az olaraq hesab edirik ki, yayılan görüntülərə və ictimai narahatlıqlara 7 saylı Regional Ekologiya və Təbii Sərvətlər İdarəsi tərəfindən operativ münasibət bildirilməsi, aparılan monitorinqlər və görülən tədbirlər barədə ictimaiyyətə geniş məlumat verilməsi vacibdir.
Məsələ diqqətimizdədir. Aidiyyəti qurumların mövqeyini dərc etməyə və təqdim olunacaq rəsmi məlumatları işıqlandırmağa hazırıq.
